Fleiri tilföng

Alþjóðlegar reglur Tesla um umhverfismál, heilsu og öryggi (EHS&S)

Verkefni

Verkefni EHS&S-reglna Tesla er að hraða umbreytingu heimsins í átt að sjálfbærri orku með því að smíða, selja, þjónusta og afhenda rafknúin farartæki á öruggan hátt og vörur sem framleiða og geyma hreina orku og hægt er að stækka endalaust.

Hugsjón

EHS&S-hugsjón Tesla er að hraða umbreytingunni í átt að sjálfbærri framtíð en tryggja öryggi, sanngirni og skemmtun í dag.

Gildi

EHS&S-gildi Tesla eru einföld og algild:

• Breyttu rétt
• EHS&S er sameiginleg ábyrgð okkar og þetta byrjar hjá mér
• EHS&S er hluti af öllu sem við gerum

Meginreglur og markmið

Við metum og verndum fólk, jörð, eignir og vörur með því að viðhalda öruggum, heilbrigðum og umhverfismeðvituðum vinnustað án málamiðlana í þágu framleiðslu eða hagnaðar. Til að styðja verkefni og leiðbeiningar Tesla er ætlast til þess að hver sem innir af hendi verk fyrir Tesla eða á starfsstöð Tesla, taki mið af og sýni í verki fylgni við eftirfarandi meginreglur og markmið EHS&S:

• Sýni mannslífum virðingu.
• Sé samviska fyrirtækisins.
• Sýni fordæmi.
• Ræði málin, taki málin fljótt upp og láti í sér heyra.
• Efli menningu þar sem ríkir traust og virðing.
• Sé viðbúin(n), upplýst(ur) og reiðubúin(n) að bregðast við.
• Fylgi lögum og reglum.
• Minnki áhættu með fyrirbyggjandi hætti.
• Eigi samskipti við og hvetji til þátttöku starfsfólks okkar og hagsmunaaðila.
• Leitist við að draga úr umhverfisáhrifum.
• Minnki áhættu með fyrirbyggjandi hætti með því að nota stjórnskipulag og meginreglur um öryggishönnun.
• Iðki félagslega og umhverfislega ábyrga áætlanagerð og ákvarðanatöku.
• Stuðli að bættum árangri fólks og fyrirtækisins í gegnum nám og stöðugar umbætur.
• Staðfesti og tryggi öryggi stjórntækja og verndarráðstafana.
• Nýti sér hugsun sem byggir á fyrstu meginreglum til að leysa vandamál fljótt og nýstárlega.
• Tryggi gagnsæja skýrslugerð.
• Taki eftir og verðlauni góða frammistöðu tengda EHS&S.

Alþjóðleg mannréttindastefna Tesla

Kynning og gildissvið  

Siðferðileg meðferð á öllu fólki og virðing fyrir mannréttindum er þungamiðjan í sýn Tesla á sjálfbæra framtíð fyrir alla. Þessi alþjóðlega mannréttindastefna („stefna“) á bæði við um okkar eigin starfsemi og aðfangakeðju okkar og nær til þeirra samfélaga sem starfsemi okkar og aðfangakeðjan okkar hafa áhrif á, bæði beint og á fyrri stigum. Við tökum ábyrgð okkar á að virða mannréttindi alvarlega og ætlumst til þess að samstarfsaðilar okkar geri slíkt hið sama.

Þessi stefna er formfesting skuldbindingar okkar um að hafa í heiðri, virða og innlima mannréttindi og þau gildi sem þau standa fyrir í rekstri okkar þegar við flýtum fyrir umskiptum heimsins yfir í sjálfbæra orku. Þessi stefna stendur fyrir það hvernig við eflum traust, drögum úr áhættu og aukum vermætasköpun hagsmunaaðila til lengri tíma litið. Tesla viðurkennir mannréttindayfirlýsingu Sameinuðu þjóðanna („UDHR“) sem fjallar um reisn, virðingu og jafnrétti án mismununar, fyrir alla. Við notum einnig leiðbeinandi meginreglur Sameinuðu þjóðanna um viðskipti og mannréttindi og viðmiðunarreglur Efnahags- og framfarastofnunarinnar fyrir fjölþjóðleg fyrirtæki.

Í stefnunni eru helstu staðlar og væntingar á sviði mannréttinda sem við höfum til vinnustaða okkar, rekstrareininga, starfsfólks, birgja og samstarfsaðila. Tesla skilgreinir birgja sína sem öll fyrirtæki eða einstaklinga sem taka þátt í aðfangakeðju sem framleiðir vörur og þjónustu fyrir Tesla, hvort sem er beint eða óbeint, sem og starfsfólk þeirra, fulltrúa og undirverktaka, sem hér eftir eru nefndir „birgjar“. Stefnan er innlimuð í viðskiptasiðareglur Tesla og allir starfsmenn og verktakar Tesla þurfa að haga sér í samræmi við þessa stefnu. Hún er einnig innfelld í hátternisreglur birgja okkar og við ætlumst til þess að birgjar okkar og samstarfsaðilar innleiði skilvirk kerfi til að fylgja þessari stefnu.

Þar sem landslög og alþjóðlegir mannréttindastaðlar eru ólíkir munum við fylgja þeim stöðlum sem ganga lengra; þar sem þetta stangast á munum við fylgja landslögum og leita leiða til að virða alþjóðleg mannréttindi eins og kostur er.

Stjórnsýsla

Tesla fer reglulega yfir og uppfærir reglur sínar og tengd ferli. Á tveggja ára fresti fer Tesla í heildarendurskoðun á reglum sínum ásamt þverfaglegum fulltrúum innan fyrirtækisins til að tryggja að reglurnar séu uppfærðar og endurspegli vaxandi starfsemi Tesla.

Yfirumsjón með vinnu okkar við að virða mannréttindi, bæði í rekstri okkar og innan aðfangakeðjunnar, er í höndum þverfaglegra teyma og framkvæmdafulltrúa. Við fáum einnig ytri hópa reglulega til að veita okkur ábendingar um nálgun okkar að mannréttindum.

Skuldbinding

Tesla leggur áherslu á að viðhalda og virða öll alþjóðlega viðurkennd mannréttindi og þau gildi sem þau standa fyrir í beinni starfsemi okkar og í aðfangakeðjunni okkar, bæði beint og á fyrri stigum - þar á meðal með tilliti til starfsfólks okkar, viðskiptavina, hluthafa, birgja og samfélaganna sem við búum og störfum í. Við reynum að forðast að valda eða stuðla að raunverulegum eða hugsanlegum skaðlegum áhrifum á mannréttindi og við ætlumst til þess að birgjar okkar styðji við og tali um fyrir þessum gildum í starfsemi sinni og þeirra birgja.

Mat og viðbrögð við mannréttindaáhættu er stöðugt ferli sem felur í sér að taka þátt í og bæta við tillögum frá ytri hagsmunaaðilum sem geta mögulega haft áhrif, þar á meðal frá hagsmunaaðilum sem verða fyrir áhrifum frá rekstri okkar og aðfangakeðju, sem og að skoða og uppfæra stefnur okkar og verkleg þegar þörf krefur. Með þennan skilning að vopni leggur Tesla áherslu á að bregðast við hugsanlegum skaðlegum áhrifum á mannréttindi. Við reynum að bæta úr skaðlegum áhrifum, fylgjast með og mæla framgang okkar og greina frá niðurstöðum okkar.

Til að uppfylla ábyrgð okkar á því að virða mannréttindi, höfum við skuldbundið okkur til að innleiða leiðbeinandi meginreglur Sameinuðu þjóðanna um viðskipti og mannréttindi. Við framkvæmum áreiðanleikakannanir vegna mannréttinda til að greina áhættu og vinna að því að draga úr henni. Við erum meðvituð um að sumir hópar eru viðkvæmari en aðrir; í stefnu okkar og allri viðleitni er þess gætt að virða þá sem minna mega sín eða eru jaðarsettir.

Áberandi mannréttindamál

Eftirfarandi efni byggir á viðurkenndum alþjóðlegum mannréttindastöðlum og endurspegla nokkur áberandi mannréttindamál sem við höfum greint í rekstri okkar og aðfangakeðju. Tesla uppfærir þennan lista reglulega þegar svæðisbundið samhengi breytist eða þegar við uppfærum stefnu okkar. Virðing okkar fyrir mannréttindum einskorðast ekki við þessi atriði.

Heilsa og öryggi

(Í samræmi við 3. gr. UDHR)

Heilsa og öryggi eru grundvallargildi Tesla. Viðleitni okkar til að tryggja heilbrigðan og öruggan vinnustað styrkir skuldbindingu okkar um mannréttindi.

Tesla hefur einsett sér að haga öllum rekstrarþáttum þannig að öryggi og heilsa starfsfólks, verktaka, viðskiptavina, birgja og almennings sé vernduð. Við reynum eftir fremsta megni að lágmarka meiðsli og sjúkdóma, svo og eignatap eða rekstrartruflanir vegna slysa, eldsvoða eða annarrar hættu.

Tesla leggur áherslu á að veita vandaðan búnað, aðgang að hreinu vatni, örugg verkfæri og nauðsynlegan hlífðarbúnað til að tryggja öryggi starfsfólks. Starfsmenn taka þátt í að greina mögulega hættu, sjá fyrir áhættu og vinna að því að útrýma eða hafa stjórn á mögulegri hættu á vinnustað. Tesla er stöðugt að veita upplýsingar um öryggi, fræðslu og nauðsynleg úrræði til að viðhalda öruggu starfsumhverfi. Starfsmenn hafa vald til að stöðva vinnu ef ótryggar aðstæður eða hátterni kemur upp svo hægt sé að bæta úr viðkomandi verki og ljúka því á öruggan hátt.

Við ætlumst til þess að allt starfsfólk fylgi öryggisráðstöfunum okkar og taki virkan þátt í að tryggja öryggi hvers annars. Starfsfólk okkar er hvatt til að eiga samskipti sín á milli og við stjórnendur ef það verður vart við athafnir sem ekki eru öruggar eða ef ekki er hægt að tryggja öryggi starfsumhverfisins. Við leggjum okkur fram við að viðhalda öruggum og afkastamiklum vinnustað með persónulegri skuldbindingu og frábærum samskiptum. Tesla mun ekki skerða neinar heilsu- eða öryggiskröfur vegna gróða eða framleiðslu. Þetta er styrkt með þeim meginreglum og markmiðum sem lýst er í alþjóðlegri stefnu okkar um umhverfismál, heilsu og öryggi (EHS&S) í samræmi við regluramma ISO 45001.

Tesla fer einnig fram á að birgjar fyrirtækisins tryggi að starfsfólki þeirra og verktökum sé tryggt heilbrigt og öruggt vinnuumhverfi. Birgjar þurfa að virða vinnustundir eins og þær eru skilgreindar í siðareglum birgja okkar. Yfirvinna verður að vera samþykkt, í samræmi við gildandi lög og skal greidd með álagi. Siðareglur birgja Tesla veita frekari upplýsingar um væntingar okkar og fylgni við reglugerðir vegna heilbrigði og öryggis aðfangakeðju.

Vinnuþrælkun, nútíma þrælahald og mansal

(Í samræmi við 4., 5. og 23. gr. UDHR)

Tesla viðurkennir skilgreiningar Alþjóðavinnumálastofnunarinnar á vinnuþrælkun, nútíma þrælahaldi og mansali og hefur skuldbundið sig til að berjast gegn slíkri misnotkun, þar á meðal skuldaánauð, skuldsettri vinnu og skylduvinnu í fangelsum. Við erum staðráðin í að tryggja að aðfangakeðja okkar - frá hráefni til lokaafurða - sé laus við slíka misnotkun.

Við mótum ítarlegar stefnur, fylgjumst með birgjum okkar og setjum á fót öflugar verklagsreglur sem tryggja að enginn neyðist til að vinna. Við notumst við kerfisbundnar aðferðir til að greina og takast á við áhættu í aðfangakeðjunni og nýtum vísbendingar um nauðungarvinnu sem skilgreindar eru af Alþjóðavinnumálastofnuninni. Við erum meðvituð um landfræðilega áhættu, vinnuaflsþróun og aðra þætti í gegnum heimildir eins og hópa í atvinnugreinum, félagasamtök, birgja, starfsmenn, virta fjölmiðla og aðra hagsmunaaðila. Við þjálfum starfsfólk í vitundarvakningu og forvörnum gegn vinnuþrælkun og krefjumst þess að birgjar leggi hönd á plóginn við að binda enda á misnotkun.

Við munum ekki umbera flutninga, hýsingu, ráðningu, framsal eða móttöku á fólki með ógn, valdi, þvingunum, brottnámi eða svikum vegna vinnu eða þjónustu. Engan starfsmann má neyða til vinnu eða láta hann sæta líkamlegri refsingu eða hótunum um ofbeldi eða annars konar líkamlegt, kynferðislegt, andlegt eða munnlegt ofbeldi í hegningar- eða stjórnunarskyni. Ennfremur leyfum við ekki nein bein eða óbein stjórntæki, þar á meðal hótanir, líkamsmeiðingar eða efnahagslega eða tilfinningalega misnotkun eða fjölskyldumisnotkun á vinnustöðum okkar né á vinnustöðum birgja okkar.

Allt starfsfólk á rétt á ferðafrelsi og ráðningarskilmálar mega ekki takmarka för þess með því að halda skilríkjum eða tryggingu eftir, með kröfum um húsnæði eða öðrum aðgerðum sem miða að því að takmarka hreyfanleika starfsfólks.

Í samræmi við meginreglu um launagreiðslur ætti enginn starfsmaður að þurfa að greiða ráðningargjöld eða önnur svipuð gjöld til að tryggja starf sitt eða halda því. Tesla leyfir ekki að ráðningargjöld eða önnur gjöld vegna ráðningar, svo sem umsóknar-, skráningar-, ráðningar- eða úrvinnslugjöld, séu innheimt af starfsmönnum. Vinnuveitandinn skal bera allan kostnað við ráðningar. Ef í ljós kemur að starfsmenn hafa greitt ráðningargjöld eða önnur tengd gjöld vegna ráðningar krefst Tesla endurgreiðslu á öllum kostnaði vegna slíkra gjalda.

Ef það fyrirfinnast brot á stefnum okkar grípum við til tafarlausra aðgerða til að bæta úr vandanum og bæta rekstur birgja og aðstæður fyrir starfsfólk. Tesla lítur á vísbendingar um vinnuþrælkun sem alvarlegasta misbrest sem fyrirfinnst og setur það í algjöran forgang að bregðast við þess konar áhættu.

Yfirleitt vinnum við að því í samstarfi við birgja að fara yfir helstu orsakir og samþykkjum eftir því sem við á, áætlanir um að bæta, leiðrétta og fylgjast með vísbendingum um endurbætur og þátttöku starfsmanna. Ákveðin stórfelld brot á mannréttindum munu leiða til þess að Tesla slíti samstarfi við birgja og taki það ekki upp á nýjan leik fyrr en sannanir um leiðréttingar eru lagðar fram og birgirinn hefur styrkt stjórnunarkerfi sitt til að koma í veg fyrir brot í framtíðinni.

Vinnuafl barna og ungt starfsfólk

(Í samræmi við 4., 5., 25. og 26. gr. UDHR)

Við virðum réttindi barna og ungs starfsfólks. Tesla bannar barnavinnu í rekstri sínum og aðfangakeðju. Tesla virðir staðar- og landslög til hlítar sem takmarka vinnu fólks undir lögaldri. Óháð landslögum má ekkert starfsfólk vera undir 15 ára aldri á vinnustað eða stað sem veitir efni eða þjónustu sem notað er í vörum Tesla. Við krefjumst þess að birgjar okkar og ráðningarþjónusta frá þriðja aðila sannreyni aldur og auðkenni starfsfólks við ráðningu til að tryggja að það uppfylli kröfur Alþjóðavinnumálastofnunarinnar um lágmarksaldur til að fá aðgang að vinnu og hafi þannig rétt til vinnu. Við krefjumst þess einnig að birgjar og ráðningarþjónusta þriðja aðila hafi áreiðanlega verkferla til að bæta úr hugsanlegum brotum á stefnum.

Tesla hvetur til starfsþróunar fólks sem mögulega getur orðið starfsfólk síðar í gegnum starfsþjálfun eða nemendavinnu. Hins vegar eiga þessi verkefni að vera hönnuð með velferð nemenda í huga og fela í sér þjálfun þeirra. Þátttakendur í slíkum verkefnum mega ekki vinna störf sem eru líkleg til að stofna heilsu þeirra eða öryggi í hættu, þar á meðal í nætur- eða yfirvinnu. Allir þátttakendur eiga að fá sanngjarna umbun fyrir vinnu sína með hliðsjón af landslögum.

Komi upp tilvik barnavinnu innan aðfangakeðju okkar - eins og hún er skilgreind í landslögum eða með einstaklingum yngri en 15, hvort sem strangara er - mun Tesla grípa til tafarlausra aðgerða og tryggja viðeigandi úrbætur, þar á meðal skráningu barnsins í kennsluáætlun. Ef í ljós kemur að starfsfólk yngri en 18 ára (ungt verkafólk) tekur að sér hættuleg störf er það umsvifalaust fjarlægt úr aðstæðunum og boðin önnur vinna sem hæfir aldri og er ekki hættuleg. Tesla leggur áherslu á að tryggja að ekkert starfsfólk yngri en 18 ára vinni hættulega eða skaðlega vinnu.

Við innleiðingu þessarar stefnu mun Tesla vinna að því að auka getu birgja, einkum lítilla og meðalstórra fyrirtækja, til að framkvæma gagnlegar áreiðanleikakannanir varðandi áhættu vegna barnavinnu - þar á meðal verstu tegund barnavinnu.

Að veita jöfn tækifæri

(Í samræmi við 1., 7. og 23. gr. UDHR)

Tesla leggur áherslu á að koma fram við alla af sanngirni og veita öllum jöfn tækifæri með því að skapa og viðhalda vinnustað sem einkennist af samvinnu um leið og unnið er af virðingu. Í samræmi við landslög felur þetta í sér rétt launafólks til að stofna og ganga í stéttarfélög sem það velur sjálft eða velur að ganga ekki í eða stofna og ganga í önnur fulltrúasamtök starfsfólks ef við á, til að semja sameiginlega og taka einnig þátt í friðsamlegum samkomum, sem og rétt starfsfólks til að forðast slíkar aðgerðir.

Tesla virðir að bakgrunnur starfsfólks er misjafn og afstaða þess ólík og stuðlar að fullu að jöfnum tækifærum fyrir allt starfsfólk, bæði núverandi og það sem ráðið verður síðar. Rétt eins og við mismunum ekki á grundvelli eiginleika sem njóta verndar samkvæmt lögum, reglugerðum eða samþykkt krefjumst við þess að birgjar okkar virði starfsfólk sitt á sama hátt. Til að tryggja að meginreglum um sanngirni og jöfn tækifæri sé fylgt þjálfar Tesla starfsfólk sitt reglulega í þessum væntingum og fylgist með niðurstöðum í gegnum kvartanaferli og með því að skoða viðhorf starfsfólks. Frekari upplýsingar um væntingar okkar til birgja sem tengjast jöfnum tækifærum á vinnustaðnum má finna í siðareglum okkar fyrir birgja.

Umhverfisvernd

(Í samræmi við 25. gr. UDHR)

Í okkar eigin starfsemi og í allri aðfangakeðju okkar leitast Tesla við að lágmarka neikvæð áhrif á umhverfið. Við vitum að umhverfisvernd, ásamt þáttum í áhrifum loftslagsbreytinga, öflun endurnýjanlegrar orku og rafvæðing, loftgæði, umhirða vatns, meðhöndlun og endurvinnsla úrgangs, varnir gegn eyðingu skóga og verndun líffræðilegs fjölbreytileika eru hvert og eitt ófrávíkjanlegt skilyrði mannréttinda. Við reynum að draga úr umhverfisáhrifum á öllum stigum líftíma vörunnar og ætlumst því til þess að birgjar okkar deili markmiði okkar um að umhverfisvernd sé lykilþáttur sjálfbærrar framtíðar. Við fylgjum regluramma ISO 14001 í starfsemi okkar. Frekari upplýsingar um væntingar okkar til birgja sem tengjast umhverfisvernd má finna í siðareglum okkar fyrir birgja.

Tengsl við samfélög og réttindi frumbyggja

(Í samræmi við 27. gr. UDHR)

Tesla hefur einsett sér að vera ábyrgur hluti af þeim samfélögum sem við búum í og störfum. Auk getu okkar til að skapa störf og stuðla að efnahagslegum og tæknilegum framförum á viðkomandi svæði, nýtum við okkur þau gildi sem tengslin í vistkerfi okkar bæta við samfélagið. Við ætlumst til þess að starfsfólk okkar, viðskiptavinir, birgjar og samstarfsaðilar leggi sig stöðugt fram um að bæta jákvæða þætti starfsins og draga úr neikvæðum áhrifum starfseminnar á nærsamfélag, þ.m.t. umhverfislega, samfélagslega, menningarlega og aðra þætti lífsins. Við hvetjum til opinna samskipta hagsmunaaðila við nærsamfélag (t.d. með almennum upplýsingafundum og stöðugu sambandi við borgaralegt samfélag, til dæmis æskulýðsfélög eða svæðissamtök), með áherslu á að þróa í sameiningu verkefni og aðgerðir sem styðja við okkar sýn og hafa jákvæð áhrif á samstarfsaðila okkar á svæðinu.

Tesla leggur áherslu á að virða yfirlýsingu Sameinuðu þjóðanna um réttindi frumbyggja (UNDRIP) og við krefjumst þess að birgjar virði UNDRIP-samninginn á sama hátt. Vinnsla á hráefnum hefur í gegnum tíðina haft slæm áhrif á réttindi frumbyggja og samfélög á þeim svæðum þar sem slík vinnsla fer fram. Í öllum uppgreftri og vinnslu á hráefnum sem Tesla notar í vörur sínar ætlumst við til þess að birgjar okkar eigi í samstarfi við lögmæta fulltrúa frumbyggjasamfélaga og virði réttindi þeirra til að veita eða hafna óþvinguðu, fyrirfram upplýstu samþykki (FPIC) hvað starfsemi fyrirtækjanna varðar.

Vöruöryggi

(Í samræmi við 3. gr. UDHR)

Mannleg mistök eru stærsti þátturinn í yfir 90 prósentum af banvænum bílslysum. Sjálfvirk öryggistækni ökutækja hefur í för með sér loforð um framtíð þar sem ökutæki hjálpa ökumönnum í auknum mæli að forðast árekstra. Tesla hefur verið drifkrafturinn í þróun á þessari lífsbjörgunartækni. Vöruhönnun og verkfræðimenning Tesla byggir á grunni öryggis.

Tesla lítur á það sem mannréttindi að hafa möguleika á að kaupa öruggar vörur og við skuldbindum okkur um að skapa, hanna, framleiða og afhenda öruggar vörur. Öryggi er að baki öllum ákvörðunum og hefur stýrt hönnun og framleiðslu okkar á rafhlöðueiningum fyrir bíla og orkugeymslu. En skuldbinding Tesla endar ekki þar. Við leitumst stöðugt við að læra og bæta okkur, með mótvægisaðgerðum, áhættustjórnun og nýsköpun. Nýstárleg notkun stórgagna og þráðlausra uppfærslna gerir okkur kleift að bregðast við og læra af reynslu viðskiptavina okkar.

Tesla leggur áherslu á marga þætti í öryggi ökutækja, þar á meðal: virkt öryggi - sem getur komið í veg fyrir eða dregið úr fyrirsjáanlegum árekstrum; óbeint öryggi - að vernda farþega, þar á meðal börn, gangandi, hjólandi og aðra viðkvæma vegfarendur þegar ekki verður komist hjá árekstri; og öryggi eftir árekstra - stuðningur við viðbragðsaðila. Forrit okkar „gagnadrifið öryggi“ notast við skynjarapakka ökutækja okkar til að safna raungögnum úr slysum svo að teymi geti skilgreint tegundir árekstra sem ekki er getið í reglugerðum eða öryggismati en geta átt sér stað í raunheimum. Þrátt fyrir að nútímatækni geti ekki útrýmt öllu líkamstjóni og banaslysum, sjáum við fyrir okkur leið sem dregur verulega úr slysum á þjóðvegum og dregur úr meiðslum þegar slys eiga sér stað. Í gegnum þessi öryggisgleraugu vonumst við til þess að viðhalda orðstír okkar sem fyrirtæki sem er leiðandi í því að draga úr líkum á meiðslum, innan og utan ökutækja okkar. Tesla stuðlar einnig að framförum í öryggismálum með því að deila bestu starfsvenjum sem hvetja bílaiðnaðinn til dáða.

Tesla hannar og prófar orkugeymslu og sólarorkuafurðir til að tryggja að þær minnki og stýri hættu við allar aðstæður. Þó að allar vörur sem geyma orku, eins og rafhlöður, geti bilað, hafa vörur okkar uppfyllt og tekið fram úr mörgum öryggisstöðlum í iðnaðinum og hafa stöðugt sýnt það í gegnum ítarlegar prófanir þriðju aðila að þær eru einhver öruggustu kerfi sem fyrirfinnast á markaðnum.

Ábyrg gervigreind

(Í samræmi við 3. og 12. gr. UDHR)

Tesla leggur áherslu á ábyrga þróun gervigreindar með virðingu fyrir mannréttindum. Í samræmi við skuldbindingu okkar um vöruöryggi mun notkun okkar á gervigreind beinast að því að bæta öryggi starfsfólks okkar, viðskiptavina og þeirra samfélaga þar sem vörur okkar eru notaðar. Tesla er ekki að þróa stafræna ofurgreind.

Til langs tíma litið viðurkennir Tesla hættuna af miðstýringu á stórum flota sjálfstýrandi ökutækja og vélmenna. Ef aðilar (ríki eða aðrir aðilar) með illan ásetning ná valdi yfir slíkum flota mun slíkt ekki verða mannkyninu til góðs.

Til að þjóna hagsmunum siðmenningarinnar telur Tesla því best að jafnvægi sé á milli staðbundinnar hnekkingargetu og miðstýringar.

Ábyrg þróunarhugmynd Tesla nær til vélbúnaðarhönnunar, þar á meðal að takmarka gönguhraða og styrk, koma í veg fyrir að samskeyti læsist og draga úr þyngd vélmenna okkar, svo eitthvað sé nefnt.

Kvartanir og úrræði

(Í samræmi við 8. gr. UDHR)

Tesla leggur áherslu á að veita rétthöfum og verjendum réttinda leiðir til að koma á framfæri mögulegum áhyggjum. Við leggjum áherslu á að boðið sé upp á árangursrík úrræði ef slæm áhrif á mannréttindi eiga sér stað. Í slíkum tilvikum miðar Tesla að því að innleiða uppfærslur á kerfum, áreiðanleikakannanir og verklag til að koma í veg fyrir svipuð skaðleg áhrif í framtíðinni. Eins og með önnur ferli og kerfi vinnur Tesla stöðugt að því að bæta kvartana- og úrræðaferla.

Við hvetjum starfsfólk til að koma á framfæri áhyggjum og Tesla mun ekki líða neins konar hefndaraðgerðir í tengslum við tilkynningar um slíkt eða þátttöku í rannsóknum í góðri trú. Starfsmaður getur komið áhyggjum eða kvörtunum til allra stjórnenda, mannauðssviðs, starfsmannatengsla eða alþjóðlegrar reglufylgnideildar. Tesla skráir áhyggjur starfsfólks til að tryggja eftirfylgni og úrlausn. Málastjórnunarkerfið gerir viðeigandi teymum kleift að fara yfir gögn og skoða fyrirbyggjandi lausnir. Tesla er einnig með heilindalínu, tilkynningakerfi sem er tiltækt allan sólarhringinn, sjö daga vikunnar.

Heilindalína Tesla er hjálparlína sem er stjórnað af þriðja aðila og er í boði fyrir starfsfólk, verktaka og þriðju aðila, þar á meðal beina birgja og birgja á fyrri stigum aðfangakeðjunnar, starfsmenn þeirra, meðlimi samfélagsins og aðra hagsmunaaðila. Hægt er að nota kvartanaferli Tesla til að tilkynna nafnlaust um áhyggjur en heilindalínan er öflugt tæki til að tilkynna áhyggjur tengdar ólöglegri eða siðlausri háttsemi eða mannréttindabrotum, þar á meðal barnaþrælkun eða nauðungarvinnu. Þegar áhyggjur eru tilkynntar í gegnum heilindalínuna vinnur Tesla með hagsmunaaðilum að því að rannsaka áhyggjuefnin og taka á málum eða bæta aðstæður sem upp koma, eins og við á í hverju tilviki fyrir sig. Frekari upplýsingar um heilindalínu Tesla eru á síðunni „Önnur úrræði“, en tengil á hana má finna hér fyrir neðan.

Við reynum að auka vitund og þekkingu starfsmanna okkar og starfsmanna aðfangakeðjunnar á mannréttindum og hvetjum öll til að koma á framfæri, án hefndaraðgerða, þeim áhyggjum sem þau kunna að hafa. Við erum staðráðin í að auka stöðugt getu stjórnenda okkar til að greina og bregðast við vandamálum á áhrifaríkan hátt.

Tesla leitast við að nota aðstöðu sína og hvetja ábyrga aðila til að meta aðstæður og grípa til úrbóta, jafnvel við aðstæður þar sem Tesla tengist ekki beint greindum skaðlegum áhrifum. Við myndum grípa til aðgerða til að snúa við neikvæðum áhrifum sem tengjast okkur og íhuga að eiga samstarf við jafningja og aðra samstarfsaðila um sameiginlegar úrbætur, þar á meðal samstarf við hagsmunaðila og birgja.

Við ætlumst til þess að birgjar okkar og birgjar þeirra innleiði skilvirkt kvartanastjórnunarkerfi fyrir rekstur sinn, sem nær til starfsfólks birgja og lögmætra fulltrúa þeirra. Birgjar skulu banna hefndaraðgerðir gegn einstaklingum sem koma fram með áhyggjuefni.

Við notumst við mat utanaðkomandi aðila til að leggja mat á það hvort kvartanaferlar og boðleiðir fyrir starfsfólk til að lýsa áhyggjum sínum séu viðunandi, skilvirkar og aðgengilegar. Tesla hvetur birgja sína til að hafa samráð við mögulega eða raunverulega notendur um hönnun, útfærslu eða virkni búnaðar þeirra.

Í þeim tilfellum þar sem hagsmunaaðilar kjósa frekar ferli utan þeirra sem starfrækt eru af Tesla, má nálgast önnur kvartanaferli á borð við kvartanaferli Responsible Business Alliance, kvartanaferli Responsible Minerals Initiative og kvartanaferli utan dómstóla sem samræmd eru af Efnahags- og framfarastofnuninni (OECD), í gegnum tengiliði Efnahags- og framfarastofnunarinnar fyrir ábyrga viðskiptahætti.

Gagnsæi og skýrslugjöf

Eins og mælt er með í leiðbeinandi meginreglum Sameinuðu þjóðanna um viðskipti og mannréttindi skuldbindum við okkur til að veita gagnsæja skýrslugerð um viðleitni okkar og framvindu. Við greinum opinberlega frá frammistöðu okkar á nokkra vegu, þar á meðal í áhrifaskýrslu okkar, skýrslu um nútíma þrælahald og barnaþrælkun og skýrslu um jarðefni sem tengjast átökum.

Tilvísanir 

• Önnur úrræði: Heilindalína
• Meginreglur um launagreiðslur
• Vísar Alþjóðavinnumálastofnunarinnar um vinnuþrælkun
• Grundvallarsamþykkt Alþjóðavinnumálastofnunarinnar nr. 138, um lágmarksaldur við vinnu
• Viðmiðunarreglur Efnahags- og framfarastofnunarinnar fyrir fjölþjóðleg fyrirtæki
• Innlendir tengiliðir Efnahags- og framfarastofnunarinnar fyrir ábyrga viðskiptahætti
• Kvartanakerfi bandalags ábyrgra fyrirtækja
• Kvartanakerfi Responsible Minerals Initiative
• Viðskiptasiðareglur Tesla
• Skýrsla Tesla um átakajarðefni
• Alþjóðlegar reglur Tesla um umhverfismál, heilsu og öryggi (EHS&S)
• Áhrifaskýrsla Tesla
• Skýrsla Tesla um nútíma þrælahald
• Hegðunarviðmið Tesla birgja
• Leiðbeinandi meginreglur Sameinuðu þjóðanna um viðskipti og mannréttindi
• Mannréttindayfirlýsing Sameinuðu þjóðanna
• Yfirlýsing Sameinuðu þjóðanna um réttindi frumbyggja

Síðast uppfært í maí 2025

Heilindalína Tesla

Heilindalína Tesla er hjálparlína undir stjórn þriðja aðila sem er í boði fyrir starfsfólk, verktaka og þriðju aðila, þar á meðal birgja, starfsfólk þeirra, fólk úti í samfélaginu og aðra hagsmunaaðila. Heilindalínan er ein þeirra kvörtunarleiða Tesla sem hægt er að nota til að tilkynna áhyggjur af mögulegum brotum á viðskiptasiðareglum Tesla, stefnum Tesla eða lögum.

Ábyrgð starfsfólks

Starfsfólk Tesla bera ábyrgð á að viðhalda trausti á Tesla. Starfsfólk verður að tilkynna brot á viðskiptasiðareglum, hátternisreglum birgja, mannréttindastefnu og öðrum reglum fyrirtækisins eða lögum til yfirmanns síns, mannauðsfulltrúa, alþjóðlegrar reglufylgnideildar Tesla, lögfræðideildar, innri endurskoðunar eða heilindalínu Tesla. Vísvitandi tilkynning rangra upplýsinga er andstæð gildum Tesla og viðskiptasiðareglum Tesla; starfsfólk sem tekur þátt í slíku mun sæta viðeigandi viðurlögum.

Aðgengi og nafnleynd

Heilindalínan er í boði á um það bil 30 tungumálum og er aðgengileg allan sólarhringinn, alla daga vikunnar, Hún gerir öllum kleift að tilkynna um áhyggjur nafnlaust og án ótta við hefndaraðgerðir. Heilindalínan býður upp á tilkynningar eftir ýmsum leiðum, meðal annars gegnum netgátt og símalínur til að tryggja aðgengi, sérstaklega fyrir viðkvæma hópa eða jaðarhópa. Notkun heilindalínunnar okkar útilokar ekki möguleika á lagalegum úrræðum fyrir dómstólum eða annars konar úrræðum.

Þegar spurning eða áhyggjuefni er sent í gegnum heilindalínuna geturðu búið til prófíl með netfanginu þínu eða notandanafni og lykilorði. Ef þú gerir það færðu tilkynningu um svör gegnum gáttina sem þú notaðir til að senda inn áhyggjuefni þitt og kannt að fá beiðni um að veita frekari upplýsingar eftir innsendingu. Heilindalínan býður einnig upp á alþjóðleg símanúmer ef þú vilt frekar tilkynna áhyggjuefni í gegnum síma. Áhyggjuefni sem eru tilkynnt gegnum síma bjóða einnig upp á nafnleynd.

Rannsóknar- og úrlausnarferli

Tesla tekur öll áhyggjuefni sem tilkynnt eru í góðri trú alvarlega. Viðeigandi fagfólk kannar öll mál tafarlaust og á viðeigandi hátt. Áhyggjuefnum sem tengjast ábyrgum uppruna og mannréttindum er beint til starfsfólks deildar sem hefur með ábyrgan uppruna að gera hjá Tesla. Markmið Tesla er að staðfesta móttöku áhyggjuefnis innan þriggja sólarhringa og leysa mál innan 30 daga. Í sumum tilvikum kann að vera þörf á lengri tíma. Tesla skuldbindur sig til að viðhafa gagnsætt innra verklag þar sem ábyrgð á meðhöndlun kvörtunar er skilgreind og að skoða það reglulega og bæta skilvirkni.

Til að vernda trúnað og heilindi rannsóknarferlisins er upplýsingum eingöngu deilt með þeim „sem þurfa að vita“ og þess er vandlega gætt að forðast að hafa neikvæð áhrif á einstaklinginn sem tilkynnti áhyggjuefnið meðan á rannsókninni stendur. Eftirfylgni er hluti af Heilindalínukerfinu þannig að tilkynnanda sé gert ljóst að tekið hafi verið á áhyggjuefni hans og málinu lokað. Eftir því sem við á vinnum við með hagsmunaaðilum að því að takast á við eða bæta aðstæður sem bent er á.

Engar hefndaraðgerðir

Tesla líður ekki neinar hefndaraðgerðir gagnvart starfsfólki eða þriðju aðilum sem í góðri trú tilkynna áhyggjuefni eða taka þátt í rannsóknum. Við gerum einnig kröfu um að birgjar okkar banni hefndaraðgerðir gagnvart starfsmönnum og öðrum hagsmunaaðilum (þar á meðal fulltrúum þeirra) sem tilkynna áhyggjuefni. Við komum fram við alla einstaklinga af virðingu.

Gagnsæisskýrslur Tesla

Hér að neðan eru reglur Tesla sem tengjast ábyrgum uppruna.

Yfirlýsing Kanada vegna laga um baráttu gegn vinnuþrælkun og barnavinnu í aðfangakeðjum

  Sækja PDF

Síðast uppfært í júní 2025

Skýrsla um steinefni tengd átökum

  Sækja PDF

Síðast uppfært í júní 2025

Listi Tesla yfir málmbræðslur og hreinsunarstöðvar 

  Sækja PDF

Síðast uppfært í júní 2025

Stefnumarkandi yfirlýsing þýskrar aðfangakeðju um áreiðanleikakönnun

  Sækja PDF (enska)

  Sækja PDF (þýska)

Síðast uppfært í október 2023